ಅಂಕಣ

ಬೈಡೆನ್ ಗೆಲುವೆಂದರೆ ಟ್ರಂಪಿಸಂನ ಸೋಲೆ?

ಲೇಖನ : ಶಿವಸುಂದರ್ (ಲೇಖಕರು ಹಿರಿಯ ಪತ್ರಕರ್ತರು, ಪ್ರಗತಿಪರ ಚಿಂತಕರು ಹಾಗೂ ಜನಪರ ಹೋರಾಟಗಾರರು. )



ಇಡೀ ಜಗತ್ತು ಆತಂಕ ಹಾಗೂ ಕುತೂಹಲದಿಂದ ನಿರೀಕ್ಷಿಸುತ್ತಿದ್ದ ಅಮೆರಿಕದ ಚುನಾವಣೆಯ ಫಲಿತಾಂಶ ಕೊನೆಗೂ ಹೊರಬಿದ್ದಿದೆ. ಇಡೀ ಪ್ರಜ್ನಾವಂತ ಜಗತ್ತೇ ಬಯಸುತ್ತಿದ್ದಂತೆ ಟ್ರಂಪ್ ಸೋತಿದ್ದಾರೆ. ಡೆಮಾಕ್ರಾಟ್ ಪಕ್ಷದ ಬೈಡೆನ್ ಗೆದ್ದಿದ್ದಾರೆ.

ಪ್ರಗತಿಪರ ಆಲೋಚನೆಗಳುಳ್ಳ ಹಾಗೂ ನೆಮ್ಮದಿಯ ನಾಳೆಯನ್ನು ಬಯಸುವ ಯಾವುದೇ ಪ್ರಜ್ನಾವಂತ ವ್ಯಕ್ತಿಯೂ ಟ್ರಂಪ್ ಗೆಲುವನ್ನು ಆಶಿಸಲು ಸಾಧ್ಯವೇ ಇರಲಿಲ್ಲ. ಹೀಗಾಗಿ ಟ್ರಂಪ್ ಸೋಲು ಜಗತ್ತಿಗೆ ಒಂದಷ್ಟು ನಿರಾಳ ತಂದಿದೆ.

ಆದರೆ ಟ್ರಂಪಿನ ಸೋಲಿನ ಸ್ವರೂಪ ಹಾಗೂ ಡೆಮಾಕ್ರಾಟ್ ಬೈಡೆನ್ ಅವರ ಗೆಲುವಿನ ರೀತಿ ಹಾಗೂ ಅಜೆಂಡಾಗಳು ಈ ನಿರಾಳವನ್ನು ಕ್ಷಣಿಕಗೊಳಿಸಿದೆ. ಟ್ರಂಪ್ ಸೋತರೂ ಟ್ರಂಪಿಸಂ ಸೋತಿತೇ?

ಈ ಚುನಾವಣೆ ಡೆಮಾಕ್ರಾಟರೊಳಗಿರುವ ರಿಪಬ್ಲಿಕನ್ನರನ್ನೂ ಹಾಗೂ ಬೈಡೆನ್ನೊಳಗಿರುವ ಟ್ರಂಪನ್ನು ನಿಜಕ್ಕೂ ಸೋಲಿಸಿತೇ ಎಂಬ ಆಳವಾದ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ.

ಈ ಜಿಗ್ನಾಸೆಯು ಭಾರತವನ್ನು ಒಳಗೊಂಡಂತೆ ಉದಾರವಾದಿ ಕಾಲಘಟ್ಟದಲ್ಲಿ ಬಂಡವಾಳಶಾಹಿ ಒದಗಿಸಿರುವ ತೋರಿಕೆಯ ಪ್ರಜಾತಂತ್ರವನ್ನು ಅಪ್ಪಿಕೊಂಡಿರುವ ಎಲ್ಲಾ ಪ್ರಜಾತಂತ್ರಗಳು ಎದುರಿಸುತ್ತಿರುವ ದ್ವಂದ್ವವೇ ಆಗಿರುವುದರಿಂದ ಅಮೆರಿಕದ ಫಲಿತಾಂಶದ ಈ ದ್ವಂದ್ವಗಳಿಗೆ ಬಣ್ಣದ ಬಟ್ಟೆ ತೊಡಿಸದೆ ಚರ್ಚಿಸುವ ಅಗತ್ಯವಿದೆ.

ವಾಸ್ತವವಾಗಿ, ಚುನಾವಣೆಯ ಮುನ್ನ ಡೆಮಾಕ್ರಾಟರು ಭಾವಿಸಿದಂತೆ ಅಮೆರಿಕದ ಜನ ರಿಪಬ್ಲಿಕನ್ನರನ್ನು ಸಾರಾ ಸಗಟು ತಿರಸ್ಕರಿಸಿ ಡೆಮಾಕ್ರಾಟರಿಗೆ ಬಂಬಲಿಸಿಲ್ಲ. ಹಗೆ ನೋಡಿದರೆ ಡೆಮಾಕ್ರಾಟರು ತಾಂತ್ರಿಕವಾಗಿ ಗೆದ್ದಿದ್ದರೂ ನೈತಿಕವಾಗಿ ಗೆದ್ದಿಲ್ಲ.

ಏಕೆಂದರೆ ಟ್ರಂಪ್ ನ ಆರ್ಥಿಕ ನೀತಿಗಳು, ಕೋವಿಡ್ ನಿಭಾವಣೆ, ಕರಿಯರ ಮೇಲಿನ ದೌರ್ಜನ್ಯಗಳ ಬೆಂಬಲ, ವಲಸೆಕೋರ ಹಿಸ್ಪಾನಿಕರ ವಿರುದ್ಧದ ನೀತಿ, ಕಾರ್ಮಿಕ ವಿರೋಧಿ-ಪರಿಸರ ವಿರೋಧಿ ನೀತಿಗಳು, ವ್ಯಕ್ತಿಗತವಾಗಿ ಈವರೆಗಿನ ಯಾವ ಅಧ್ಯಕ್ಷರೂ ಪ್ರದರ್ಶಿಸದಷ್ಟು ಅತಿರೇಕದ ಹಾಗೂ ಕೀಳು ಅಭಿರುಚಿಯ ಬಿಳಿಯ ದುರಭಿಮಾನಿ ವರ್ತನೆಗಳಿಂದಾಗಿ ಬೈಡೆನ್ ಅವರ ಆಯ್ಕೆ ತುಂಬಾ ಸುಲಭವಾಗಿ ಹಾಗೂ ಆಪಾರ ಬಹುಮತದೊಂಡಿಗೆ ನಡೆಯಬಹುದೆಂದು ನಿರೀಕ್ಷಿಸಲಾಗಿತ್ತು.

ಆದರೆ ಹಾಗಾಗಲಿಲ್ಲ.

ಗೆದ್ದ ಗೆಲುವಲ್ಲ- ಸೋತ ಸೋಲಲ್ಲ

ಟ್ರಂಪ್ ಮತ್ತು ಅವರ ರಿಪಬ್ಲಿಕನ್ ಪಕ್ಷ ಅಧ್ಯಕ್ಷೀಯ ಚುನಾವಣೆಯಲ್ಲಿ ಸೋತರೂ, ಗೆದ್ದ ಡೆಮಾಕ್ರಾಟುಗಳ ಗೆಲುವಿನ ಅಂತರ ತುಂಬಾ ಕಡಿಮೆ ಇದೆ. ಹಾಗೆ ನೋಡಿದಲ್ಲಿ ಗೆದ್ದ ಡೆಮಾಕ್ರಾಟ್ ಬೈಡೆನ್ ಅವರೂ ಅಮೆರಿಕದ ಚುನಾವಣೆಯ ಇತಿಹಾಸದಲ್ಲೇ ಅತಿಹೆಚ್ಚು ಅಂದರೆ ೭.೪ ಕೋಟಿ ಮತಗಳನ್ನು ಪಡೆದಿರುವುದು ಹೇಗೆ ಇತಿಹಾಸವೋ ಅದೇ ರೀತಿ ಸೋತ ಟ್ರಂಪೂ ಪಡೆದ ೭ ಕೋಟಿ ಮತಗಳೂ ಸಹ ಅಮೆರಿಕದ ಇತಿಹಾಸದಲ್ಲೇ ಸೋತ ಅಧ್ಯಕ್ಷೀಯ ಅಭ್ಯರ್ಥಿಯೊಬ್ಬ ಪಡೆದ ಅತ್ಯಧಿಕ ಮತಗಳಾಗಿವೆ. ಅಷ್ಟು ಮಾತ್ರವಲ್ಲ. ೨೦೧೬ರಲ್ಲಿ ಪಡೆದ ಮತಗಳಿಗಿಂತ ೮೦ ಲಕ್ಷ ಹೆಚ್ಚು ಮತಗಳು ಟ್ರಂಪಿಗೆ ದಕ್ಕಿದೆ. ಅಂದರೆ ಟ್ರಂಪ್ ನ ನೀತಿಗಳನ್ನು ಅಥವಾ ಟ್ರಂಪಿಸಮ್ಮನ್ನು ಮೊದಲಿಗಿಂತ ಹೆಚ್ಚು ಅಮೆರಿಕನ್ನರು ಬಂಬಲಿಸುತ್ತಿದ್ದಾರೆ ಎಂದಾಯಿತು.

ಅಷ್ಟು ಮಾತ್ರವಲ್ಲ ಟ್ರಂಪ್ ಆಡಳಿತಾವಧಿಯಲ್ಲಿ ಆಫ್ರೋ-ಅಮೆರಿಕನ್ನರ ಮೇಲೆ ಬಿಳಿಯ ಭಯೋತ್ಪಾದಕರು ಹಾಗೂ ಪೊಲೀಸರು ನಿರಂತರವಾಗಿ ಹಲ್ಲೆಗಳನ್ನು ನಡೆಸಿದರು. ಫ್ಲಾಯ್ಡ್ ಎಂಬುವರನ್ನು ಕೊಂದೇ ಹಾಕಿದರು. ಮೆಕ್ಸಿಕೋದಿಂದ ವಲಸೆ ಬರುವ ಬಡ ಹಿಸ್ಪಾನಿಕರನ್ನು ರೇಪಿಸ್ಟುಗಳೆಂದೂ, ಕಳ್ಳರೆಂದೂ ಬಣ್ಣಿಸಿದ್ದ ಟ್ರಂಪ್, ಅಮೆರಿಕ-ಮೆಕ್ಸಿಕೋ ಗಡಿಯಲ್ಲಿ ದೊಡ್ಡ ಗೋಡೆಯನ್ನು ಕಟ್ಟುವ ಸನಾಹವನ್ನು ನಡೆಸಿದ್ದರು. ಆದರೂ ಈ ಬಾರಿಯ ಚುನಾವಣೆಯಲ್ಲಿ ೨೦೧೬ಕ್ಕಿಂತ ಶೇ. ೨ರಷ್ಟು ಹೆಚ್ಚು ಆಫ್ರೋ-ಅಮೆರಿಕನ್ನರು ಟ್ರಂಪಿನ ಪರವಾಗಿ ಓಟು ಹಾಕಿದ್ದಾರೆ. ಹಿಸ್ಪಾನಿಕರು ಹೆಚ್ಚಿರುವ ಟೆಕ್ಸಾಸ್ ಮತ್ತು ಫ್ಲಾರಿಡಾ ಪ್ರಾಂತ್ಯಗಳಲ್ಲಿ ಹಿಸ್ಪಾನಿಕರು ಶೇ. ೪೦-೫೦ ರಷ್ಟು ಹೆಚ್ಚುವರಿಯಾಗಿ ಓಟು ಹಕಿದ್ದರಿಂದ ಅಲ್ಲಿ ರಿಪಬ್ಲಿಕನ್ ಪಕ್ಷ ಹಿಂದೆಂದಿಗಿಂತಲೂ ಭರ್ಜರಿ ವಿಜಯವನ್ನು ದಾಖಲಿಸಿದೆ. ಈ ಪ್ರದೇಶಗಳಲ್ಲಿ ಬೈಡೆನ್ ಮತ್ತವರ ಡೆಮಾಕ್ರಾಟ್ ಪಕ್ಷ ಅತ್ಯಂತ ದುರ್ಬಲ ಸಾಧನೆ ಮಾಡಿದೆ.

ಹೀಗಾಗಿ ಟ್ರಂಪ್ ಸೋತರೂ ಟ್ರಂಪಿಸಮ್ಮು ಅನುಮಾನ, ಅವಿಶ್ವಾಸಗಳಿಂದ ಅಮೆರಿಕವನ್ನು ಮೊದಲಿಗಿಂತ ಹೆಚ್ಚು ಧ್ರೂವೀಕರಣಗೊಳಿಸಿದೆ.

ಡೆಮಾಕ್ರಾಟ್ ಅಧ್ಯಕ್ಷ- ರಿಪಬ್ಲಿಕನ್ ನೀತಿ

ಅಮೆರಿಕದ ಅಧ್ಯಕ್ಷೀಯ ಚುನಾವಣೆಯ ಜೊತೆಗೆ ಅಮೆರಿಕದ ೧೦೦ ಸದಸ್ಯ ಬಲದ ಮೇಲ್ಮನೆಯಾದ ಸೆನೆಟ್ಟಿಗೂ ಹಾಗೂ ೪೩೫ ಬಲದ ಹೌಸ್ ಆಫ್ ರೆಪ್ರೆಸೆಂಟಿಟೀವ್ಸ್ ಗೂ ಚುನಾವಣೆಗಳು ನಡೆದಿವೆ. ಎರಡೂ ಕಡೆ ರಿಬ್ಲಿಕನ್ ಪಕ್ಷ ೨೦೧೬ಕ್ಕಿಂತ ಉತ್ತಮ ಸಾಧನೆಯನ್ನು ಮಾಡಿದೆ.

ಈವರೆಗೆ ಬಂದಿರುವ ಫಲಿತಾಂಶಗಳ ಪ್ರಕಾರ ಅಧ್ಯಕ್ಷರ ಯಾವುದೇ ತೀರ್ಮಾನಗಳಿಗೆ, ಕ್ಯಾಬಿನೆಟ್ ರಚನೆಗೂ ಕೂಡಾ ಒಪ್ಪಿಗೆ ಕೊಡದೇ ಸತಾಯಿಸಬಹುದಾದ ಸೆನೆಟ್ಟಿನ ಚುನಾವಣೆಯಲ್ಲಿ ಡೆಮಾಕ್ರಾಟರು ಮತ್ತು ರಿಪಬ್ಲಿಕನ್ನರಿಬ್ಬರಿಗೂ ತಲಾ ೪೮ ಸೀಟುಗಳು ಲಭ್ಯವಾಗಿವೆ. ಜನವರಿ ೫ ರಂದು ಜಾರ್ಜಿಯಾ ಪ್ರಾಂತ್ಯದಲ್ಲಿ ಎರಡು ಸೆನೆಟ್ ಸ್ಥಾನಗಳಿಗೆ ನಡೆಯಲಿರುವ ಚುನಾವಣೆಯ ಫಲಿತಾಂಶವು ಅಧ್ಯಕ್ಷ ಬೈಡೆನ್‌ಗೆ ಎಷ್ಟು ಸ್ವಾತಂತ್ರ್ಯವಿರಲಿದೆ ಎಂಬುದನ್ನು ನಿರ್ಧರಿಸಲಿದೆ.

ಹಾಗೆಯೇ ಹೌಸ್ ಆಫ್ ರೆಪ್ರೆಸೆಂಟಿಟೀವ್ಸ್ ನಲ್ಲಿ ಬಹುಮತವಾದ ೨೧೮ರ ಗಡಿರೇಖೆ ದಾಟಲು ಡೆಮಾಕ್ರಾಟರಿಗೆ ಇನ್ನು ಕೇವಲ ಮೂರು ಸ್ಥಾನಗಳು ಮಾತ್ರ ಅಗತ್ಯವಿದೆ. ಆದರೆ ಅದು ೨೦೧೬ಕ್ಕೆ ಹೋಲಿಸಿದಲ್ಲಿ ೪ ಸ್ಥಾನಗಳನ್ನು ಕಳೆದುಕೊಂಡಿದ್ದರೆ, ರಿಪಬ್ಲಿಕನ್ ಪಕ್ಷ ೨೦೧೬ಕ್ಕೆ ಹೋಲಿಸಿದಲ್ಲಿ ೫ ಸ್ಥಾನಗಳನ್ನು ಹೆಚ್ಚುವರಿಯಾಗಿ ಪಡೆದುಕೊಂಡಿದೆ. ಹಾಗೂ ಎಷ್ಟೇ ಪೂರಕ ವಾತಾವರಣವಿದ್ದರೂ ಡೆಮಾಕ್ರಾಟ್ ಪಕ್ಷ ರಿಪಬ್ಲಿಕನ್ ಪಕ್ಷದಿಂದ ಒಂದು ಸೀಟನ್ನೂ ಕಿತ್ತುಕೊಳ್ಳಲಾಗಿಲ್ಲ.

ಪ್ರಾರಂಭಿಕ ಸರ್ವೆಗಳಲ್ಲಿ ವ್ಯಕ್ತವಾದಂತೆ ಶೇ. ೪೮ರಷ್ಟು ಜನ ಟ್ರಂಪ್ ಅಧಿಕಾರಕೆ ಬಂದ ಮೇಲೆ ತಮ್ಮ ಜೀವನಮಟ್ಟ ಸುಧಾರಿಸಿದೆ ಎಂದು ಭಾವಿಸುತ್ತಾರೆ. ರಿಪಬ್ಲಿಕನ್ ಮತದಾರರಿಗೆ ಕೋವಿಡ್ ಬಿಕ್ಕಟ್ಟನ್ನು ಟಂಪ್ ನಿಭಾಯಿಸಿದ ರೀತಿ ಒಂದು ಕಳವಳದ ವಿಷಯವೇ ಅಗಿರಲಿಲ್ಲ.

ಟ್ರಂಪ್ ಸೋತರೂ ಟ್ರಂಪಿಸಂ ಸೋತಿಲ್ಲವೇಕೆ?

ಸಾಮಾಜಿಕವಾಗಿ ಹಾಗೂ ಆರ್ಥಿಕವಾಗಿ ಸಂಪ್ರದಾಯವಾದಿ ಕನ್ಸರ್ವೇಟೀವ್ ಪಕ್ಷವಾಗಿದ್ದ ರಿಪಬ್ಲಿಕನ್ ಪಕ್ಷವನ್ನು ಜನಾಂಗೀಯವಾದಿ ಫ್ಯಾಸಿಸ್ಟ್ ಪಕ್ಷವಾಗಿ ಪರಿವರ್ತಿಸಿದ ಟ್ರಂಪಿಸಂ ಅನ್ನು ನಿರ್ಣಾಯಕವಾಗಿ ಸೋಲಿಸುವಲ್ಲಿ ಡೆಮಕ್ರಾಟರು ಏಕೆ ವಿಫಲವಾದರು?

ಕಾರಣವಿಷ್ಟೆ.

ಡೆಮಾಕ್ರಾಟರೂ ಮತ್ತು ರಿಪಬ್ಲಿಕ್ಕನ್ನರ ನಡುವೆ ಅಮೆರಿಕದ ದಮನಿತ ಜನತೆಗೆ ಹೆಚ್ಚು ವ್ಯತ್ಯಾಸಗಳೇನೂ ಕಂಡು ಬರುತ್ತಿಲ್ಲ.

ದೇಶದೊಳಗೆ ಕಾರ್ಪೊರೇಟ್ ಶಕ್ತಿಗಳ ಪರವಾಗಿ ಕಾರ್ಮಿಕರ ಶೋಷಣೆ ಮಾಡುವಲ್ಲಿ, ಸಂಪತ್ತಿನ ಕೇಂದ್ರೀಕರಣ ಹೆಚ್ಚಿಸುವಲ್ಲಿ, ಕರಿಯರ ಮೇಲೆ ವ್ಯವಸ್ಥಿತ ತಾರತಮ್ಯ ಮಾಡುವಲ್ಲಿ, ಜಗತ್ತನ್ನು ತನ್ನಿಷ್ಟಕ್ಕೆ ತಕ್ಕಂತೆ ಮಣಿಸಲು ಮಿಲಿಟರಿ ಶಕ್ತಿಯನ್ನು ಬಳಸುವಲ್ಲಿ ರಿಪಬ್ಲಿಕನ್ನರು ಮತ್ತು ಡೆಮಾಕ್ರಾಟರುಗಳ ನಡುವೆ ಇರುವ ವ್ಯತ್ಯಾಸ ಕೇವಲ ಮಾತುಗಳಲ್ಲೇ ಹೊರತು ಕೃತಿಗಳಲ್ಲಲ್ಲ.

ಉದಾಹರಣೆಗೆ ಎರಡನೇ ಮಹಾಯುದ್ಧದ ನಂತರ ಅಮೆರಿಕ ಜನತೆ ಹಾಗೂ ಕಾರ್ಪೊರೇಟು ಕಂಪನಿಗಳು ೨೦೦೮ರಲ್ಲಿ ಅತ್ಯಂತ ದೊಡ್ಡ ಆರ್ಥಿಕ ಬಿಕ್ಕಟ್ಟನ್ನು ಎದುರಿಸಿದರು.

ಆ ಹಿನ್ನೆಲೆಯಲ್ಲೇ ಸಾಮಾಜಿಕ ಹಾಗೂ ಆರ್ಥಿಕ ನ್ಯಾಯ ಹಾಗೂ ಆರ್ಥಿಕ ಬಿಕ್ಕಟ್ಟಿನಿಂದ ವಿಮೋಚನೆಯ ಆಶ್ವಾಸನೆಯನ್ನು ನೀಡಿದ ಡೆಮಾಕ್ರಾಟ್ ಪಕ್ಷದ ಬರಾಕ್ ಒಬಾಮನನ್ನು ನಂಬಿ ಅಮೆರಿಕದ ಇತಿಹಾಸದಲ್ಲೇ ಮೊಟ್ಟ ಮೊದಲ ಬಾರಿಗೆ ಆಫ್ರೊ-ಅಮೆರಿಕನ್ನನ್ನು ಅಧ್ಯಕ್ಷರನ್ನಾಗಿ ಮಾಡಿದರು. ಮಾತ್ರವಲ್ಲ ಅವರನ್ನು ಎರಡನೇ ಬಾರಿಯೂ ಅಧ್ಯಕ್ಷರನ್ನಾಗಿ ಚುನಾಯಿಸಿದರು.

ಆದರೆ ಒಬಾಮ ಅವರ ಮಾತುಗಳು ಎಷ್ಟು ನ್ಯಾಯದ ಬಿಸಿಯಿಂದ ಕೂಡಿದ್ದರೂ ಕೃತಿಯಲ್ಲಿ ಮಾತ್ರ ಅಷ್ಟೇ ತಣ್ಣನೆ ಕ್ರೌರ್ಯದಿಂದ ಕೂಡಿದ ಆರ್ಥಿಕ ನೀತಿಗಳನ್ನೇ ಒಬಾಮ ನೇತೃತ್ವದ ಡೆಮಾಕ್ರಾಟಿಕ್ ಪಕ್ಷ ಅನುಸರಿಸಿತು. ಹೀಗಾಗಿ ಅಮೆರಿಕದ ಇತಿಹಾಸದಲ್ಲೇ ಅತ್ಯಂತ ಹೆಚ್ಚಿನ ಸಂಪತ್ತಿನ ಕೇಂದ್ರೀಕರಣ, ಆರ್ಥಿಕ ಅಸಮಾನತೆಗಳು ಉಂಟಾದದ್ದು ಒಬಾಮಾ ಅವಧಿಯಲ್ಲೇ. ಆದ್ದರಿಂದಲೇ ಅವರ ಎರಡನೇ ಅಧ್ಯಕ್ಷೀಯ ಅವಧಿಯನ್ನು ಕಾರ್ಪೊರೇಟ್ ಕಂಪನಿಗಳು ಉತ್ಸಾಹದಿಂದ ಬೆಂಬಲಿಸಿದರು. ಜಾಗತಿಕವಾಗಿಯೂ ಒಬಾಮ ಅವರು ಬುಷ್ ಅವರ ಎಲ್ಲಾ ಸಾಮ್ರಾಜ್ಯಶಾಹಿ ನೀತಿಗಳನ್ನೂ ಹಾಗೂ ಬಿಳಿಯರ ಅಕ್ರಮಣಕಾರಿ ನೀತಿಗಳನ್ನು ಮುಂದುವರೆಸಿದರು.

ಆದ್ದರಿಂದ ರಿಪಬ್ಲಿಕನ್ನರಿಗೂ ಮತ್ತು ಡೆಮಾಕ್ರಾಟರಿಗೂ ವ್ಯತ್ಯಾವೇನಾದರೂ ಇದೆಯೇ ಎಂದು ಅರಿತುಕೊಳ್ಳಬೇಕೆಂದರೆ ಅಮೇರಿಕಾದ ಕರಿಯರನ್ನು ಕೇಳಬೇಕು, ಹಿಸ್ಪಾನಿಕರನ್ನು ಕೇಳಬೇಕು.. ಮಾಲ್ಕಮ್ ಎಕ್ಸ್ ಅನ್ನು ಕೇಳಬೇಕು, ಮಾರ್ಟಿನ್ ಲೂಥರ್ ಕಿಂಗ್ ಅನ್ನು ಕೇಳಬೇಕು.. ಅಮೇರಿಕಾದ ಲೂಟಿಗೆ ಗುರಿಯಾಗಿರುವ ಲ್ಯಾಟಿನ್ ಅಮೇರಿಕ, ಆಫ್ರಿಕಾ ಹಾಗೂ ಅರಬ್ಬರನ್ನು, ಪ್ಯಾಲೆಸ್ಟೀನಿಯರನ್ನು, ಅಫ್ಘನ್ನರನ್ನು, ಏಷಿಯಾ ದೇಶಗಳ ರೈತಾಪಿ ಮತ್ತು ಆದಿವಾಸಿಗಳನ್ನು ಕೇಳಬೇಕು..

ಆಫ್ರಿಕಾ ದ ರಾಷ್ಟ್ರೀಯವಾದಿ ಜನನಾಯಕ ಜೂಲಿಯಸ್ ನೈರೇರೆ ಹೇಳುವಂತೆ:

“The Unites States is also a one party state, but with a typical extravagance, they have two of them”

(ಅಮೆರಿಕವೂ ಕೂಡಾ ಒಂದೇ ಪಕ್ಷದ ಆಡಳಿತವಿರುವ ಪ್ರಭುತ್ವವೇ. ಆದರೆ ಅಮೆರಿಕನ್ನರ ದುಂದುಬದುಕಿಗೆ ತಕ್ಕಂತೆ ಎರಡಿವೆಯಷ್ಟೆ).

ಅಮೆರಿಕದ ತೇರಿಗೆ ರಿಪಬ್ಲಿಕನ್ನರದ್ದು ಒಂದು ಕಾಲು. ಡೆಮಾಕ್ರಾಟರದ್ದು ಒಂದು ಕಾಲು. ತೇರು ಮುಂದಕ್ಕೆ ಹೋಗಬೇಕೆಂದರೆ ಒಂದು ಕಾಲು ಮುಂದಿರಬೇಕು. ಆದ್ದರಿಂದಲೇ ಮತ್ತೊಂದು ಕಾಲು ಹಿಂದಕ್ಕಿರಬೇಕು ಅಷ್ಟೆ. ರಿಪಬ್ಲಿಕನ್ನರ ಸೋಲಿಗೋಮ್ ಡೆಮಾಕ್ರಾಟರ ಗೆಲುವಿಗೂ ಇರುವ ವ್ಯತ್ಯಾಸವೂ ಅಷ್ಟೇ.

ಪ್ರೋಗ್ರೆಸೀವ್ ಡೆಮಾಕ್ರಾಟರು ಸೋಲುತ್ತಾರೆ, ಮಾಡರೇಟರು ಗೆಲ್ಲುತ್ತಾರೆ

ವಾಸ್ತವದಲ್ಲಿ ಅಮೆರಿಕದ ಚುನಾವಣೆಗಳು ನಡೆಯುವ ಮುನ್ನ ರಿಪಬ್ಲಿಕನ್ ಹಾಗೂ ಡೆಮಾಕ್ರಾಟ್ ಪಕ್ಷದೊಳಗೆ ಯಾರು ಅಧ್ಯಕ್ಷೀಯ ಅಭ್ಯರ್ಥಿಯಾಗಬೇಕೆಂಬ ಪ್ರೈಮರಿ ಚುನಾವಣೆಗಳು ನಡೆಯುತ್ತವೆ. ಡೆಮಾಕ್ರಾಟ್ ಪಕ್ಷದೊಳಗೆ ಕಳೆದ ಮೂರು ಚುನಾವಣೆಗಳಿಂದ ಬಂಡವಾಳಶಾಹಿ ಹಾಗೂ ಜನಾಂಗೀಯವಾದಿ ನೀತಿಗಳಿಗೆ ಸಮಾಜವಾದಿ ಸ್ವರೂಪದ ಪರ್ಯಾಯಗಳನ್ನು ಮುಂದಿಡುತ್ತಾ ಬಂದಿರುವ ಬರ್ನಿ ಸ್ಯಾಂಡರ್ಸ್ ಅವರನ್ನು ಡೆಮಾಕ್ರಾಟ್ ಪಕ್ಷ ಅದರ ಪ್ರೈಮರಿಗಳಲ್ಲಿ ಸೋಲಿಸುತ್ತಲೇ ಬಂದಿದೆ. ಡೆಮಾಕ್ರಾಟ್ ಪಕ್ಷದೊಳಗೆ ಮಾಡರೇಟುಗಳು ಎಂದು ಕರೆಸಿಕೊಳ್ಳಲ್ಪಡುವ ಕಾರ್ಪೊರೇಟ್ ಭಟ್ಟಂಗಿಗಳಿಗೂ, ಪರ್ಯಾಯಕ್ಕೆ ತಳಮಟ್ಟದಲ್ಲಿ ಕೆಲಸ ಮಾಡುವ ಪ್ರೊಗ್ರೆಸೀವ್ ಮತ್ತು ಆಕ್ಟಿವಿಸ್ಟುಗಳಿಗೂ ಸದಾ ಸಂಘರ್ಷ ನಡೆಯುತಲ್ಲೇ ಇರುತ್ತದೆ. ಮತ್ತು ಸದಾ ಸ್ಯಾಂಡರ್ಸ್ ಹಾಗೂ ಪ್ರೋಗ್ರೆಸೀವ್ ಬಣವನ್ನು ಕಾರ್ಪೊರೇಟುಗಳು ಸೋಲಿಸುತ್ತಾರೆ.

ಹೀಗೆ ಡೆಮಾಕ್ರಾಟುಗಳ ಅಧ್ಯಕ್ಷೀಯ ಅಭ್ಯರ್ಥಿಯ ಆಯ್ಕೆ ಅಂತಿಮಗೊಳ್ಳುವ ಪ್ರಕ್ರಿಯೆಯಲ್ಲೇ ರಿಪಬ್ಲಿಕನ್ನರ ತದ್ರೂಪಿ ಹುಟ್ಟಿಕೊಂಡಿರುತ್ತಾನೆ/ಳೆ.

ಈ ಬಾರಿಯೂ ಸ್ಯಾಂಡರ್ಸ್ ಅವರು ಕನಿಷ್ಟ ಕೂಲಿ ಹೆಚ್ಚಿಸುವ, ಸರ್ವರಿಗೂ ಉಚಿತ ಆರೊಗ್ಯ ರಕ್ಷಣೆ ಒದಗಿಸುವ, ಅದಕ್ಕಾಗಿ ಕಾರ್ಪೊರೇಟ್ ಉದ್ದಿಮೆಪತಿಗಳಿಗೆ ಹೆಚ್ಚುವರಿ ತೆರಿಗೆ ವಿಧಿಸುವ, ಇನ್ನಿತರ ಹಲವಾರು ಸಮಾಜಮುಖಿ ಅಜೆಂಡಾಗಳನ್ನು ಮುಂದಿಟ್ಟಿದ್ದರು. ಅದೇ ಅಜೆಂಡಾಗಳನ್ನು ಅವರು ರಿಪಬ್ಲಿಕನ್ ಪಕ್ಷದ ಪರವಾಗಿದ್ದ ಬಿಳಿಯ ಕಾರ್ಮಿಕರ ಮಧ್ಯೆಯ ಪ್ರಚಾರ ಮಾಡಿ ಬೆಂಬಲ ಗಳಿಸಿದ್ದರು. ಆದರೆ ಡೆಮಾಕ್ರಾಟ್ ಪಕ್ಷದೊಳಗಿನ ಮಾಡರೇಟುಗಳು ಅವರನ್ನು ಸೋಲಿಸಿದರು. ಆ ನಂತರವೇ ಕಾರ್ಪೊರೇಟ್ ಧಣಿಗಳು ಡೆಮಾಕ್ರಾಟ್ ಪಕ್ಷಕ್ಕೆ ನಿಧಿ ಒದಗಿಸಲು ಪ್ರಾರಂಭಿಸಿದರು.

ಈ ಬಾರಿ ಟ್ರಂಪ್ ಅವರ ಕೆಲವು ತಿಕ್ಕಲು ನೀತಿಗಳು ಮತ್ತು ವರ್ತನೆಗಳು ಕಾರ್ಪೊರೇಟ್ ಕುಲದ ವ್ಯವಸ್ಥಿತ ನಿರ್ವಹಣೆಗೂ ಅಡ್ಡಿಯಾಗಿದ್ದರಿಂದ ಈ ಬಾರಿ ಅಮೆರಿಕದ ಕಾರ್ಪೊರೇಟ್ ಕುಬೇರರು ಹಿಂದೆಂದಿಗಿಂತಲೂ ದೊಡ್ಡ ಮಟ್ಟದಲ್ಲಿ ಡೆಮಾಕ್ರಾಟರ ಬೆಂಬಲಕ್ಕೆ ನಿಲ್ಲಲು ಸಿದ್ಧವಿದ್ದರು. ಆದರೆ ತಮ್ಮ ಆಸಕ್ತಿಗಳಿಗೆ ಕಡುನಿಷ್ಟೆ ತೋರಬಲ್ಲ ಉಮೇದುವಾರ ಬೇಕಿತ್ತಷ್ಟೆ. ಅದನ್ನು ಡೆಮಾಕ್ರಾಟ್ ಪಕ್ಷ ಬೈಡೆನ್ ರೂಪದಲ್ಲಿ ಒದಗಿಸಿತು.

ಬೈಡೆನ್ ಒಳಗಿನ ಟ್ರಂಪು

ಬೈಡೆನ್ ಅವರು ಡೆಮಾಕ್ರಾಟ್ ಪಕ್ಷದ ಅತ್ಯಂತ ಹಿರಿಯ ಸದಸ್ಯರು ಮಾತ್ರವಲ್ಲ ಮತ್ತು ಅಮೆರಿಕದ ಅತ್ಯಂತ ಹಿರಿಯ ಹಾಗೂ ನುರಿತ ರಾಜಕಾರಣಿಯಾದ ಅಧ್ಯಕ್ಷರೂ ಆಗಲಿದ್ದಾರೆ.

೧೯೭೦ರ ದಶಕದಲ್ಲಿ ಡೆಮಾಕ್ರಾಟ್ ಪಕ್ಷದ ಮೂಲಕ ರಾಜಕಾರಣಕ್ಕೆ ಕಾಲಿಟ್ಟ ಬೈಡೆನ್ ೩೫ ವರ್ಷಗಳ ಕಾಲ ಸೆನೆಟರ್ ಆಗಿಯೂ ಒಬಾಮಾ ಅವರ ಅಧ್ಯಕ್ಷ ಅವಧಿಯಲ್ಲಿ ಉಪಾಧ್ಯಕ್ಷರಾಗಿಯೂ ಕೆಲಸ ಮಾಡಿದ್ದಾರೆ.

ಆದರೆ ಬೈಡೆನ್ ಎಷ್ಟು ಡೆಮಾಕ್ರಾಟ್? ಎಷ್ಟು ಉದಾರವಾದಿ?

೧೯೬೦-೭೦ ರ ದಶಕದಲ್ಲಿ ಅಮೆರಿಕದಲ್ಲಿ ಕರಿಯರ ಮೇಲೆ ಬೆಳಿಯರು ನಡೆಸುತ್ತಿದ್ದ ತಾರತಮ್ಯಗಳ ವಿರುದ್ಧ ಕರಿಯರ ಆಕ್ರೊಶ ಹಾಗೂ ಹೋರಾಟಗಳು ಭುಗಿಲೆದ್ದಿದ್ದವು. ಆ ಹೋರಾಟಗಳ ಫಲಿತವಾಗಿ ಆವರೆಗೆ ಕರಿಯರಿಗೆಂದೇ ಪ್ರತ್ಯೇಕವಾಗಿದ್ದ ಶಾಲೆಗಳ ಬದಲಾಗಿ ಕರಿಯರೂ ಬಿಳಿಯರಿಗೆ ಸೀಮಿತವಾಗಿದ್ದ ಶಾಲೆಗೆ ಹೋಗುವ ಡಿಸೆಗ್ರಿಗೇಷನ್ ಬಸ್ಸಿಂಗ್ ವ್ಯವಸ್ಥೆ ನಿಧಾನವಾಗಿ ಜಾರಿಯಾಗುತ್ತಿತ್ತು. ಆದರೆ ಅದರ ವಿರುದ್ಧ ಬಿಳಿಯರು ದೊಡ್ಡ ಮಟ್ಟದಲ್ಲಿ ತಮ್ಮ ಪ್ರತಿರೋಧವನ್ನು ತೋರಲಾರಂಭಿಸಿದರು. ಆಗ ಡೆಲ್ವರ್ ಪ್ರಾಂತ್ಯದಲ್ಲಿ ಡೆಮಾಕ್ರಾಟ್ ಪಕ್ಷದಿಂದ ಚುನಾವಣೆಗೆ ನಿಂತಿದ್ದ ಬೈಡೆನ್ ಅವರು ಈ ಬಸ್ಸಿಂಗ್ ವ್ಯವಸ್ಥೆಯನ್ನು ಖಂಡಿಸಿ ಬಿಳಿಯರ ಪರವಾಗಿ ನಿಂತು ಮತ ಕೇಳಿದ್ದರು.

ಜೊತೆಗೆ ಆಗ ಸ್ಥಳೀಯ ಪೀಪಲ್ಸ್ ಪೇಪರ್ ಎಂಬ ಪತ್ರಿಕೆಯೊಂದಕ್ಕೆ ನೀಡಿದ ಸಂದರ್ಶನದಲ್ಲಿ: “ಬಿಳಿಯರು ಕರಿಯರನ್ನು ಕಳೆದ ಮುನ್ನೂರು ವರ್ಷಗಳಿಂದ ಶೋಷಣೆ ಮಾಡುತ್ತಾ ಬಂದಿದ್ದರಿಂದ ಕರಿಯರು ಬಿಳಿಯರಿಗಿಂತ ಹಿಂದೆ ಬಿಂದಿದ್ದಾರೆ. ಆದ್ದರಿಂದ ಈಗ ಕರಿಯರಿಗೆ ಬಿಳಿಯರಿಗಿಂತ ಹೆಚ್ಚು ಪ್ರಾಶಸ್ತ್ಯ ಕೊಡಬೇಕು -ಎಂಬ ೬೦ ರ ದಶಕದಲ್ಲಿ ಚಾಲ್ತಿಯಲ್ಲಿದ್ದ ವಾದವನ್ನು ನಾನು ಬಿಲ್ಕುಲ್ ಒಪ್ಪುವುದಿಲ್ಲ” ಎಂದು ಸ್ಪಷ್ಟವಾಗಿ ಘೋಷಿಸಿದ್ದರು.

೧೯೮೦ರ ದಶಕದಲ್ಲಿ ಗಲ್ಲು ಶಿಕ್ಷೆಯ ಪರವಾದ ಕಾನೂನು ರಚನೆಯಲ್ಲಿ, ಅಮೆರಿಕದ ಸೆರೆಮೆನಯಲ್ಲಿ ಪೆರೋಲ್ ನೀಡುವ ನಿಯಮಗಳನ್ನು ಬಿಗಿಗೊಳಿಸುವ, ಸಾಮಾನ್ಯವಾಗಿ ಕರಿಯರು ಬಳಸುವ ಅಗ್ಗದ ಅಮಲಿನ ಪದಾರ್ಥದ ಬಳಕೆಗೆ ಹೆಚ್ಚಿನ ಶಿಕ್ಷೆಯನ್ನೂ, ಬಿಳಿಯ ಮಧ್ಯಮ ವರ್ಗ ಬಳಸುತ್ತಿದ್ದ ಅಮಲು ಪದಾರ್ಥವಾದ ಕೊಕೈನ್ ಬಳಕೆಗೆ ಕಡಿಮೆ ಶಿಕ್ಷೆಯನ್ನು ವಿಧಿಸುವ ಕಾನೂನುಗಳನ್ನು ರಚಿಸಿದ್ದು ಬೈಡೆನ್ ಅವರೇ.

೧೯೯೦ರ ದಶಕದಲ್ಲಿ ಕರಿಯರ ಮತ್ತು ವಲಸೆಬಂದ ಹಿಸ್ಪಾನಿಕರ ಹೋರಾಟಗಳು ಹೆಚ್ಚುತ್ತಿದ್ದಂತೆ ಅವರುಗಳ ಅಸ್ಥಿತ್ವನ್ನೇ ಅಪರಾಧೀಕರಿಸುವ ಕ್ರೈಮ್ ಬಿಲ್ ಅನ್ನು ರೂಪಿಸಿದ ಕೀರ್ತಿಯೂ ಬೈಡೆನ್ ಅವರದ್ದೇ. ಆಗ ಅವರು ಆ ಬಿನ್ನು ಸಮರ್ಥಿಸಿಕೊಳ್ಳುತ್ತಾ :

ಒಬ್ಬ ವ್ಯಕ್ತಿ ಸಮಾಜದಲ್ಲಿ ಏಕೆ ಅಪರಾಧ ಮಾಡುತ್ತಾನೆ ಎಂಬುದು ನನಗೆ ಸಂಬಂಧಿಸದ ವಿಷಯ. ಒಬ್ಬ ವ್ಯಕ್ತಿ ಏಕೆ ಸಮಾಜ ವಿರೋಧಿಯಾಗುತ್ತಾನೆಂಬುದರ ಬಗ್ಗೆ ನಾನು ತಲೆಕೆಡಿಸಿಕೊಳ್ಳುವುದಿಲ್ಲ. ಅಂಥ ವ್ಯಕ್ತಿಗಳನ್ನು ಸಮಾಜದಲ್ಲಿ ಅಡ್ಡಾಡಲು ಬಿಡದೆ ಹಿಡಿದಿಡಿದು ಸೆರೆಮನೆಗೆ ದೂಡಬೇಕು. ಆಗಮಾತ್ರ ನಮ್ಮ ದೇಶದ ಬೀದಿಗಳು ಸುರಕ್ಷಿತವಾಗಿರುತ್ತದೆ. ಎಂದು ಸೆನೆಟ್ಟಿನ ಎಲ್ಲಾ ಸದಸ್ಯರ ಬೆಂಬಲ ಕೋರಿದ್ದರು.

ಹಾಗೆ ನೋಡಿದರೆ, ರಿಪಬ್ಲಿಕನ್ನರ ಕಾಲವಾಗಿರಲಿ, ಡೆಮಾಕ್ರಾಟರ ಕಾಲವಾಗಿರಲಿ, ಈ ಅವಧಿಯಲ್ಲಿ ಜಾರಿಗೆಬಂದ ಎಲ್ಲಾ ಜನ ವಿರೋಧಿ, ದಮನಕಾರಿ ಕಾನೂನುಗಳ ರಚನೆಯಲ್ಲೂ ಸೆನೆಟರ್ ಬೈಡೆನ್ನರ ಸಕ್ರಿಯ ಪಾತ್ರವಿಲ್ಲದೇ ಜಾರಿಗೆ ಬರಲು ಸಾಧ್ಯವಿರಲಿಲ್ಲ ಎಂದು ವಿಶ್ಲೇಷಕರು ಅಭಿಪ್ರಾಯ ಪಡುತ್ತಾರೆ.

ನಂತರ ೨೦೦೦-೩ರಲ್ಲಿ ಇರಾಕ್ ಮೇಲಿನ ಯುದ್ಧಕ್ಕೆ ಬೇಕಾಗಿದ್ದ ಸಮೂ ನಾಶ ಶಸ್ತ್ರಾಸ್ತ್ರಗಳ ನಾಶವೆಂಬ ಶತಮಾನದ ಸುಳ್ಳನ್ನೂ ಹೆಣೆದ ಎರಡೂ ಪಕ್ಷಗಳಲ್ ಗುಂಪಿನ ನಾಯಕರಾಗಿದ್ದು ಬೈದೆನ್ ಅವರೇ.

ಅ ನಂತರದ ಸಿರಿಯಾ, ಯೆಮೆನ್, ಇನ್ನಿತರ ಎಲ್ಲಾ ದೇಶಗಳಲ್ಲಿನ ಮಿಲಿಟರಿ ಮಧ್ಯಪ್ರವೇಶಕ್ಕೆ ಸರ್ಕಾರಗಳಿಗೆ ಬೇಕಾದ ಸೆನೆಟ್ ಬೆಂಬಲವನ್ನು ದೊರಕಿಸಿಕೊಡುವುದರಲ್ಲಿ ಅಮೆರಿಕನ್ ಸಾಮ್ರಾಜ್ಯದ ನಿಷ್ಟಾವಂತ ಸೇನಾಧಿಪತಿಯಾಗಿ ಬೈಡೆನ್ ತಮ್ಮ ಪರಿಣಿತಿ ತೋರಿದ್ದಾರೆ. ಹಾಗೆಯೇ ಇಸ್ರೇಲಿನ ಫ್ಯಾಸಿಸ್ಟ್ ಜಿಯೋನಿಸ್ಟ್ ಆಡಳಿತಕ್ಕೆ ಉದ್ದಕ್ಕೂ ತಮ್ಮ ಬೆಂಬಲವನ್ನು ವ್ಯಕ್ತಪಡಿಸುತ್ತಾ ಬಂದಿದ್ದಾರೆ.

ಹಾಲಿ ಚುನಾವಣೆಯ ಪ್ರಚಾರದಲ್ಲಿ :

ಅಮೇರಿಕಾದ ಜನರು ಕಷ್ಟದಲ್ಲಿರುವುದಕ್ಕೆ ಈ ದೇಶದ ೫೦೦ ಶತಕೋಟ್ಯಾಧಿಪತಿಗಳು ಖಂಡಿತ ಕಾರಣರಲ್ಲ. ಅವರು ಖಂಡಿತ ಕೆಟ್ಟವರಲ್ಲ. ಶ್ರೀಮಂತರು ಬಡವರಷ್ಟೇ ದೇಶಭಕ್ತರಾಗಿದ್ದಾರೆ (೫-೯-೨೦೧೮, Brooking Institution ಉದ್ದೇಶಿಸಿ ಮಾಡಿದ ಭಾಷಣ) ಎಂದು ಕಾರ್ಪೊರೇಟುಗಳಿಗೆ ಭರವಸೆ ಕೊಟ್ಟ ಬೈಡೆನ್ ಅವರು ಒಂದು ವೇಳೆ ಯಾವುದೇ ಸರ್ಕಾರ ಸಾರ್ವಜನಿಕ ಆರೋಗ್ಯ ಯೋಜನೆಗಾಗಿ ಕಾರ್ಪೊರೇಟುಗಳ ಮೇಲೆ ತೆರಿಗೆ ವಿಧಿಸಿದರೆ ತಾವು ಅದನ್ನು ವೀಟೋ ಮಾಡಿಬಿಡುವುದಾಗಿಯೂ ತಮ್ಮ ನಿಷ್ಟೆಯನ್ನು ವ್ಯಕ್ತಪಡಿಸಿದ್ದರು.

ಇದು ಡೆಮಾಕ್ರಾಟ್ ಬೈಡೆನ್.

ಇವರಿಗೂ ಟ್ರಂಪಿಗೂ ವ್ಯತ್ಯಾಸವೇನೆಂದು ಬಲ್ಲವರು ಹೇಳಬೇಕು.

ಆದ್ದರಿಂದಲೇ ಸಾಂಪ್ರದಾಯಿಕವಾಗಿ ಡೆಮಾಕ್ರಾಟ್ ಪಕ್ಷಕ್ಕೆ ಬರಬೇಕಿದ್ದ ಕರಿಯರ ಹಾಗೂ ಹಿಸ್ಪಾನಿಕರ ಓಟುಗಳಲ್ಲಿ ಈ ಬಾರಿ ಗಣನೀಯವಾಗಿ ಕಡಿತವಾಗಿದೆ.

ಸಹಜವಾಗಿಯೇ ಜನ ಬೈಡೆನ್ ಆಡಳಿತವನ್ನು ಧಿಕ್ಕರಿಸುತ್ತಾರೆ. ೨೦೨೪ರ ಚುನಾವಣೆಯಲ್ಲಿ ಪರಿಚಿತ ಅಪಾಯಕಾರಿಯಾದ ರಿಪಬ್ಲಿಕನ್ನರನ್ನು ಗೆಲ್ಲಿಸುತ್ತಾರೆ.

ಇಂಥಾ ರಿಪಬ್ಲಿಕನ್-ಡೆಮಕ್ರಾಟ್ ಜುಗಲ್ಬಂದಿಗಳಿಂದ ಹತಾಷೆಗೊಳ್ಳುವ ಅವಧಿಯಲ್ಲಿ ಇದಕ್ಕಿಂತ ಭಿನ್ನವಾಗಿ ಕಾಣುವ ನಿಜವಾದ ಅಥವಾ ಹುಸಿಯಾದ ಯಾವುದೇ ವಿಭಿನ್ನತೆಯನ್ನು ಅಥವಾ ಟ್ರಂಪಿನಂತವರ ತಿಕ್ಕಲುತನಗಳನ್ನು ಜನ ಪರಿಹಾರವೆಂದು ಭಾವಿಸುತ್ತಾರೆ.

ಅದಕ್ಕೆ ಬಿಕ್ಕಟ್ಟುಗಳು ಒಂದೋ ಕ್ರಾಂತಿಯನ್ನು ಅಥವಾ ಫ್ಯಾಸಿಸಂ ಅನ್ನು ತರುತ್ತದೆ ಎಂದು ರಾಜಕೀಯ ವಿಶ್ಲೇಷಕರು ಹೇಳುತ್ತಾರೆ.

ಹೀಗಾಗಿ ಪ್ರಶ್ನೆ ಇಷ್ಟೇ.

ಜುಗಲ್ಬಂದಿಗಳಲ್ಲ್ಲಿ ಡೆಮಾಕ್ರಾಟಾನಂದ ಪಡೆಯುವುದೇ? ಅಥವಾ ಪರ್ಯಾಯದ ಕಡೆಗೆ ದಿಟ್ಟ ನಡೆಯನ್ನು ಇಡುವುದೇ? ಇದು ಭಾರತದ ಪ್ರಜಾತಂತ್ರವೂ ತನ್ನ ಸಂದರ್ಭದಲ್ಲಿ ಕೇಳಿಕೊಳ್ಳಬೇಕಾದ ಪ್ರಶ್ನೆ. ಈ ನಿಟ್ಟಿನಲ್ಲಿ ಅಮೆರಿಕದಲ್ಲಿ ತಳಮಟ್ಟದಲ್ಲಿ ಕೆಲಸಮಾಡುವ ಜನಮುಖಿ ಸಂಘಟನೆಗಳು “VoteTrumpOut- Protest Biden from Day 1” (ಟ್ರಂಪನ್ನು ಸೋಲಿಸಿ- ಮೊದಲ ದಿನದಿಂದಲೇ ಬೈಡೆನ್ ಅನ್ನು ವಿರೋಧಿಸಿ ) ಎಂಬ ಅಭಿಯಾನವನ್ನು ಪ್ರಾರಂಭಿಸಿದ್ದಾರೆ.. ಇದರಲ್ಲಿ ಹೆಚ್ಚಿನ ವಿವೇಕವಿದೆಯಲ್ಲವೇ?

ಅಮೇರಿಕಾದ ಚುನಾವಣೆಯಲ್ಲಿ ಟ್ರಂಪಿನ ಸೋಲು ನಿರಾಳ ತಂದ ಬೈಡೆನ್ ಗೆಲುವಿಗೆ ಸಂಭ್ರಮಿಸಬೇಕೇ ಎಂಬ ಪ್ರಶ್ನೆ ತುಂಬಾ ಮುಖ್ಯವಾದದ್ದು. ಅದು ಭಾರತದ ಚುನಾವಣಾ ಸಂದರ್ಭದಲ್ಲೂ ಪರ್ಯಾಯ ಹಾಗು ಜನಪರ ರಾಜಕಾರಣ ಮಾಡುವವರು ಎದುರಿಸಲೇಬೇಕಾದ ಪ್ರಶ್ನೆ. ಈ ಹಿನ್ನೆಲೆಯಲ್ಲಿ ಇಂದಿನ ವಾರ್ತಾಭಾರತಿ ಯಲ್ಲಿ ನನ್ನ ಅಂಕಣ ಬರಹ “ಬೈಡೆನ್ ಗೆಲುವೆಂದರೆ ಟ್ರಂಪಿಸಂ ನ ಸೋಲೇ?” ದ ಪಠ್ಯ ರೂಪ ಕೆಳಗಿದೆ. ಸ್ವಲ್ಪ ದೀರ್ಘವಾಗಿದೆ. ಬಿಡುವುಮಾಡಿಕೊಂಡು ಓದಿ. ಒಪ್ಪಿದರೂ, ಒಪ್ಪದಿದ್ದರೂ ನಿಮ್ಮ ವಿಮರ್ಶಾತ್ಮಕ ಅಭಿಪ್ರಾಯಗಳನ್ನು ತಿಳಿಸಿ.. – ಶಿವಸುಂದರ್

________________________________________

►►ನಿಮಗೆ ಈ ಬರಹ / ಸುದ್ದಿ ಇಷ್ಟವಾಗಿದ್ದರೆ ಅಗತ್ಯವಾಗಿ Like ಮಾಡಿ ಹಾಗೂ Share ಮಾಡಿ. ►►ನಿಮ್ಮ ಭಾಗದ ಸುದ್ದಿಗಳು ಹಾಗೂ ಜಾಹೀರಾತು ಪ್ರಸಾರಕ್ಕಾಗಿ ಮೊಬೈಲ್ ಸಂಖ್ಯೆ; 9844002593 ( ಜಾಹೀರಾತು ವಿಭಾಗ) ಹಾಗೂ E-mail ID: kannadamedia1947@gmail.com (ಸುದ್ದಿ ವಿಭಾಗ) ಕ್ಕೆ ಸಂಪರ್ಕಿಸಿ. ►►ಸಾಮಾಜಿಕ ಕಾಳಜಿಯ, ಜನಪರ ಸುದ್ದಿಗಳಿಗಾಗಿ ಸದಾ ಓದಿರಿ: www.kannadamedia.com

0Shares